Сярод славутасцей аграгарадка Белая Дуброва асобае месца займае капліца ў гонар Раства Прасвятой Багародзіцы, якая ўтульна размяшчаецца ў цэнры вуліцы Першамайская.
У сераду, 24 сакавіка, з мэтай далучэння навучэнцаў да культурна-пазнавальнай і даследчай дзейнасці, накіраванай на атрыманне ведаў аб гісторыка-культурных славутасцях Белай Дубровы, фарміравання грамадзянскасці і патрыятызму, захавання гістарычнай памяці аб малой радзіме ўдзельнікі праекта, навучэнцы 8 – 11 класаў, разам з настаўнікамі наведалі славутую мясціну.
Затым адбылася сустрэча са старажылай аграгарадка Патапенкай Вялянцінай Васільеўнай. Карэнная жыхарка вёскі расказала вучням, што ў 2016 годзе па ініцыятыве братоў Юрковых, ураджэнцаў Белай Дубровы, была пабудавана капліца ў гонар Раства Прасвятой Багародзіцы якраз на тым самым месцы, дзе калісьці стаяла праваслаўная царква Раства-Багародзіцкая, што ў гады Вялікай Айчыннай вайны была разбурана.
Вось так у Белай Дуброве з’явіўся астравок духоўнасці, які стаў візітнай карткай аграгарадка. Нераўнадушныя людзі прысвячаюць гэтай славутасці свае творы. Вось адзін з іх:
У Прыбяседдзі Радзімы прасторы
Бесядзь стужкай малюе ўзоры …
Тры браты каля Белай Дубровы
На гары будавалі храм новы.
Будавалі на тым самым месцы,
Дзе калісьці стаяў храм ранейшы,
будавалі дарогу да Бога,
Шлях ад роднага і да святога …
Шмат дарог вядуць сэрца да веры,
Новы храм адчыніў людзям дзверы.
Храм драўляны ў Белай Дуброве
Тры браты збудавалі Юрковы …
(Кацярына Елісеенка)